MAYNILA — Inaresto ang isang 21-anyos na construction worker na wanted sa kasong statutory rape matapos umanong gahasain ang 13-anyos na kaibigan sa Tanay, Rizal.

Sa imbestigasyon ng Rizal police, May 2024 nangyari ang insidente sa bahay ng suspek.

Nagsumbong ang biktima sa kanyang magulang at agad itong idinulog sa pulisya.

January 2025 nang lumabas ang arrest warrant laban sa lalaki at mula noon ay nagtago na siya, ayon sa pulisiya.

Naaresto ang lalaki sa isang ospital sa Morong, Rizal matapos mag-post sa social media na manganganak na ang kanyang live-in partner noong April 15, 2025. 

"Nalaman na lang ng ating kapulisan nag-post siya sa social media na manganganak 'yung kanyang misis sa ospital. Ini-trace ng ating mga operatiba kung saan iyon at napag-alaman, doon na natunton at naaresto," sabi ni Rizal police chief Col. Felipe Maraggun. 

Itinanggi ng suspek ang paratang.

"Hindi po totoo 'yun, napagkamalan lang po ako. Tsaka hindi naman po pwede mangyari 'yung ganon kasi may asawa po ako," sabi ng 21-anyos na lalaki.

Nasa kustodiya na siya ng Tanay police at nahaharap sa kasong statutory rape na walang inirekomendang piyansa.

IBA PANG BALITA: 

1 patay, 4 sugatan matapos araruhin ng SUV sa Makati
Lalaking nagsangla ng naibenta na palang lupain sa Quezon, arestado