MAYNILA — Kalaboso ang isang Vietnamese national na nagpapanggap umano na cosmetic surgeon at nagpapatakbo ng isang aesthetic clinic sa Quezon City. 

Base sa ulat ng NBI-Organized and Transnational Crime Division (NBI-OTCD), hindi lisensyado ang mga dayuhang doktor sa naturang clinic.

“Gumagawa sila ng mga minor surgeries sa mukha ng mga pasyente. Which is, dapat, mga licensed doctors lang ang pwedeng gumawa nito,” ayon kay Atty. Jerome Bomediano, hepe ng NBI-OTCD.

“Tapos, malakas ang loob nito kasi nag-advertise pa itong mga ito sa social media.” 

‘Braces for P1,000’: Unlicensed dentist arrested in Cotabato City

Nag-aalok sila ng malaking diskwento sa mga serbisyo tulad ng botox, lip at chin filler, eyelid surgery, at alar trimming.

Ayon sa NBI, delikado ito dahil hindi dumadaan sa tamang assessment ang mga kliyente. 

“Kaya maraming Pilipino na medyo naengganyo sa kanila, kasi napakababa talaga ‘yung offer nila. Isa pa sa dapat magduda ka nito, kasi walang proper assessment,” sabi ni Bomediano.

“‘Pag palpak ‘yung ginawa nitong mga ito, lilipad lang ito ng ibang bansa. Wala na, kawawa ‘yung mga kababayan natin,” dagdag niya.

Tumanggi nang magbigay ng pahayag ang Vietnamese na sinampahan ng reklamong illegal practice of medicine.

Paalala naman ng NBI sa publiko, tangkilikin ang mga lehitimong clinic para masigurong ligtas ang mga isasagawang procedure sa katawan.