ZAMBOANGA CITY - Pinagbabaklas ng Commission on Elections (Comelec) ang ilang campaign posters ng mga kandidato sa Barangay at Sangguniang Kabataan elections sa siyudad na ito dahil sa paglabag sa Omnibus Election code.

Ayon kay Atty. Stephen Roy Cañete, election officer ng Zamboanga City, hindi sumunod sa tamang laki ng campaign posters ang ilang kandidato. Sumobra kasi ang mga ito sa 2-by-3 feet na itinakda ng
Comelec.

Ang iba naman ay sa sidewalk, puno at poste ng koryente ipinaskil ang kanilang mga campaign materials, bagay na mahigpit ding ipinagbabawal. Tinaggal din ng Comelec ang mga campaign posters na nakapaskil sa ilang public utility vehicle tulad ng pedicab.

Hindi muna magsasampa ng kaso ang Comelec laban sa mga kandidatong lumabag sa kanilang panuntunan. Pero kung magpapatuloy ang kanilang paglabag, ay ipapa-disqualify na ng Comelec ang mga ito.

Dahil kapos sa panahon ay pinili lang ng Comelec ang ilang barangay sa kanilang isinagawang Oplan Baklas.

Pero ayon kay Cañete, puwedeng maghain ng reklamo ang mga residente sa kanilang opisina kung may mapansin silang lumalabag sa batas sa paglalagay ng mga campaign materials.