Watch more News on iWantTFC

Patay nang maiahon sa Pasig River ang isang lalaking tumalon mula sa Binondo Bridge para lumangoy, Huwebes nang gabi.

Kinilala ang biktima na si Jonathan Pava, trabahador ng construction site sa tulay.

Kuwento ng kaanak, nag-iinuman sila nang mag-ayang lumangoy sa ilog ang biktima.

Pinigilan umano nila si Pava pero nagpumiglas ito at tumalon pa rin sa ilog.

Nakaahon pa umano sa una ang biktima, pero lumubog na siya sa pangatlong paglundag.

Ayon sa Manila Disaster Risk Reduction and Management Office, bukod sa epekto ng alak, posibleng natangay pailalim sa ilog ang biktima.

Paalala ng mga awtoridad sa publiko na bawal maligo sa Ilog Pasig dahil mapanganib.

-- Ulat ni Karen De Guzman, ABS-CBN News