Watch more in iWantv or TFC.tv

Dapat pang palalimin ang pag-aaral sa buhay at mga likha ni Jose Rizal, ayon sa ilang eksperto.

Ayon kay propesor Xiao Chua ng De La Salle University Department of History, hindi dapat "memorization" ang pinagtutuunan ng pansin sa pag-aaral ng Rizal Course.

"Ang problema dyan kasi, natatali tayo doon sa pag-aaral ng trivia, facts tungkol sa buhay niya," aniya.

"Hindi naman totoo na hindi natin kailangan ng facts. Kailangan natin iyang malaman pero huwag tayo matatapos doon. Anong mga facts sa buhay ni Rizal ang nakikita mong nagmahal siya sa bayan, paano natin ito ia-apply sa kasalukuyan?"

Sinang-ayunan naman ito ni propesor Jonathan Balsamo, kalihim ng Philippine Historical Association.

"Dapat these trivia should lead us to a deeper knowing of Rizal. Kapag tayo ay na-satisfy lang doon sa superficial na interesting points kay Rizal, kulang. So ang role ng guro ay kung paano natin makikita pa iyong mas malalim, mas makilala pa talaga si Rizal," aniya.

"Pag pinag-aaralan natin ang ating mga bayani, para silang mga salamin. Pag nakatingin tayo sa kanila, pero at the end ang makikita natin iyong sarili natin."

"At sa pagkakilala kay Rizal, makilala natin iyong sarili natin bilang Pilipino," dagdag ni Chua.

Sa pamamagitan din ng pag-aaral kay Rizal malalaman kung bakit siya itinanghal na isang bayani, ayon sa mga eksperto.

"The main reason na naging bayani si Rizal is that iyong sinulat niya pina-feel niya sa Pilipino — walang concept ng Pilipinas noon, hiwa-hiwalay tayo — isa ang problema natin: koloniyalismo," ani Chua.

"Para sa’kin hindi natin dapat i-impose na si Rizal ay bayani. [Kapag] itinuro sila, ang mag estudyante ay madi-discover nila kung bakit bayani si Rizal. Kapag tinatanong ako, ‘Bakit bayani si Rizal,’ hirap akong sagutin kasi personal discovery iyon na kapag nakilala nila si Rizal, sila ang makakapagsabi kung bayani si Rizal o hindi," ani Balsamo.

Maiuugnay pa rin hanggang ngayon ang mga aral at kaisipan ni Rizal, ayon naman kay Shanice Espiritu, program director ng "Project Saysay."

"Iyong mga ginawa ni Rizal, lahat ito hanggang ngayon napaka-applicable pa rin. Importanteng makita natin na iyong nangyayari sa atin noon hanggang ngayon minsan nagiging problema pa rin and we have yet to solve it," aniya.

"At nagbigay si Rizal ng ways of introducing kung paano ba natin maaayos ang bansa natin kahit paunti-unti."

Sa ilalim ng Republic Act No. 1425, kinakailangang isama sa kurikulum ng pribado at publikong paaralan ang buhay at likhang panitikan ni Jose Rizal, partikular na ang "Noli Me Tangere" at "El Filibusterismo.

Ang dalawang nobela ang unang pagpapahayag ng mga Asyano ng paglaban sa koloniyalismo ng Europa, ayon kay Chua.

"Sinabi ng Penguin Classics, this is the first anti-colonial literary manifestation in Asia against Europeans," aniya.