Sa deskripsyon noon ni Direk Rod Marmol about his film Cuddle Weather sa unang presscon ng Pista ng Pelikulang Pilipino when they announced the first batch of finalists ay ini-expect ng marami na magiging sobrang daring ang pelikula. Wala pa sa cast noon sina Sue Ramirez at RK Bagatsing.

Pero nung kinoprodyus na ng Regal Entertainment ang Cuddle Weather with Project 8 Corner San Joaquin Projects at naging bida na ng movie sina RK at Sue ay tila nabawasan na ang pagiging daring ng pelikula.

“Hindi naman nabawasan. Gusto ko lang din talaga ng artista na hindi ako lalatagan na, ‘ito yung mga bawal kong gawin,’ not necessarily dahil gagawin namin yon. Gusto ko kasing open talaga sila going in.

“Pero para lang din… Kasi I believe kapag confident ka sa katawan mo, mas confident ka din sa pag-explore ng emotions, ng themes, so walang directive sa kanila to tone down, mas desisyon ko siya. Kasi parang at the end of the day, love story po siya.

“Ayokong ma-distract yung mga tao don sa mensahe ng pelikula na kahit anong klase kang tao, kahit feeling mo madumi siya o tingin ng society sa ‘yo madumi ka, puwede kang magmahal, puwede kang mahalin.

“So, nung ina-assess ko na yung mga eksena, parang hindi ko naman na kailangan yung masyadong intense sa sex dito kasi ang goal lang naman nung scene na ‘yon ay ipakitang pokpok siya, hindi na kailangang… So yon po, mas parang direksyon ko na rin po siya,” paliwanag ng Cuddle Weather director.

Patuloy ni Direk Rod, “Hindi rin po ako komportable ng ganun ka-graphic. Parang kaya ko pong laruin yung lengguwahe, laruin yung theme, pero yung graphic na visuals parang hindi rin po siya para sa akin.”

Eh, paano ba niya napili na si Sue ang gawing bida sa pelikula at mag-portray bilang si Adela Johnson?

Kuwento ni Direk Rod, “Siya po talaga ang una naming pinag-pitch-an, eh. Kasi familiar din ako sa vlog niya online. Sa online alam kong open siya, eh. Nakita ko yung isa niyang vlog na bigla niyang tinaas yung T-shirt niya, sabi ko, ‘Ay, grabe, ang tapang.’

“Kasi ngayon lahat ng mga artista parang nagpipigil, eh. So, yon pa lang, sign na sa akin yon na puwedeng siya ang lapitan namin. Napanood ko rin siya sa mga dati niyang pelikula at magaling siya, sobrang expressive. Favorite ko kasi yung mata niya. For me kasi, feeling ko yung mga superstars may sobrang prominent na feature sa mukha kaya feeling ko she has that potential.”

May binanggit pang ibang dahilan si Direk Rod kung bakit ayaw niyang gawing mas graphic pagdating sa sexy scenes ang Cuddle Weather.

“Kasi inisip ko rin, number one na po tayo sa Pornhub, so ibig sabihin lahat ng tao nakakapanood na naman ng… Sa totoo lang, sawang-sawa naman na sila sa kan**tan, kumbaga. So, ako rin po kasi, author din ako ng mga hugot na libro, so mas love story talaga din ang space ko po,” he said.

Eh, paano naman pumasok ang name ni RK sa movie?

“Si RK, unang pelikula ko lang po, yung MataTapang naiisip ko na siyang makatrabaho pero hindi nag-match ang mga schedule, tapos siyempre limited din ang budget, pero sa pelikulang ito, first ko pa lang din sa powerpoint (presentation) si RK na ang nakalagay na mukha. Talagang nag-align sila for me.

“Marami rin po kaming mga nilapitan, kasi siyempre maraming considerations, may mga producers, pero ang nag-final talaga ay sila pa din kaya sobra akong thankful na parang nakisama na ang langit, na ito na, binigay na po,” lahad pa ng director ng pelikulang palabas na sa simula September 13 in time for the 2019 Pista ng Pelikulang Pilipino.