Nagpahayag ng pakikiramay ang dalawang pinakamataas na lider ng Senado at Kamara sa pagpanaw ni Pope Francis. 

Nakiisa si Senate President Francis Escudero sa Simbahang Katolika sa pagluluksa, sabay pagkilala sa pagiging instrumento ng yumaong lider ng simbahan sa pagtataguyod ng kapayapaan. 

Binigyang pugay din ni Escudero ang pagsusulong ni Pope Francis ng isang mundong nagkakaisa, na nakabatay sa kapayapaan at pagkakaunawaan. Inalala naman ni House Speaker Martin Romualdez ang pagbisita ni Pope Francis noong 2015 sa Tacloban, Leyte, para makadaupang palad ang mga biktima ng super typhoon Yolanda. 

Ayon kay Romualdez, nagsilbi rin bilang ama, kaibigan at ilaw noong panahon ng kadiliman, ang tinatawag din aniyang 'Lolo Kiko' ng mga Pilipino. 

Ipinaalala rin aniya ng yumaong Santo Papa na kapiling ng bawat biktima ng bagyo ang Diyos, sa kabila ng pinagdaanang pagkawasak ng tahanan at pagkawala ng mahal sa buhay. TV Patrol, Lunes, 21 Abril 2025