Watch more in iWantv or TFC.tv

Isang babae sa Tanauan City, Batangas ang kumpirmadong namatay dahil sa meningococcemia habang 3 iba pa ang hinihinalang nasawi rin sa nasabing sakit.

Kinumpirma ni Dr. Eduardo Janairo, direktor ng Department of Health (DOH) sa Calabarzon, ang pagkamatay ng isang 53 anyos na babae dahil sa meningococcemia.

Galing umanong Dubai sa United Arab Emirates ang babae at binawian ng buhay noong Setyembre 21 sa isang ospital sa Tanauan, ani Janairo.

Samantala, hinihintay pa ng DOH-Calabarzon ang resulta ng pagsusuri sa blood sample ng 3 namatay sa Lian, Nasugbu at San Jose na hinihinalang dahil din sa meningococcemia.

Ang meningococcemia ay malubhang sakit dulot ng bakterya. Maaari itong magdulot ng impeksiyon sa utak, gulugod at dugo.

Maaaring mahawa ang isang tao ng meningococcemia sa pamamagitan ng pag-ubo at paghalik.

Ilan sa mga sintomas nito ay mataas na lagnat, pananakit ng ulo, sore throat, pananakit ng kalamnan, pagsusuka at pagkakaroon ng rashes o mga pantal.

-- Ulat ni Dennis Datu, ABS-CBN News