MAYNILA - Kasado na ang ilang security plans ng Manila Police District sa lungsod ilang araw bago ang Semana Santa.

Ayon sa MPD, magpapakalat sila ng 400 dagdag pang pulis sa mga matataong lugar gaya ng mga simbahan, train station, bus terminal at paligid ng mga mall.

• Tollways naghahanda para sa dagsa ng tao sa Semana Santa 2022

Watch more in iWantv or TFC.tv

Ayon kay Police Maj. Philipp Ines, tagapagsalita ng MPD, dadagdagan din nila ang puwersa ng mga magpapatrolya, mga magsasagawa ng checkpoint at maglalagay din ng police assistance desk kung saan maaaring humingi ng tulong ang publiko.

Wala naman aniyang namomonitor sa ngayon na banta sa seguridad sa lungsod pero hindi aniya sila nagpapakakampante.

Paalala ng MPD sa publiko, sa mga may planong umuwi ng probinsya, na planuhin nang maaga ang kanilang biyahe.

• Motorcade ng Itim na Nazareno, balak isagawa sa Biyernes Santo

Tiyaking nakalock ng maayos ang mga pintuan at gate ng bahay, at kung maaari ibilin sa mapagkakatiwaalang kapitbahay o kamag-anak ang bahay.

Nananawagan ang MPD sa publiko na mag-doble ingat pa rin, sumunod sa safety protocols, maging alerto at ireport ang anomang kahinahinalang insidente.

Inaasahan na dadami ang dagsa ng mga tao ngayong naka-Alert Level 1 ang Metro Manila sa gitna ng banta ng COVID-19.

-- Ulat ni Raya Capulong, ABS-CBN News