Watch more in iWantv or TFC.tv

Maraming government-based transactions ang nanghihingi ng clearance mula sa barangay ng aplikante para mapatunayan na nakatira ito sa nasabing lugar.

Pero nakadepende sa barangay ang paniningil ng processing fee nito; may ilang nanghihingi ng bayad, may ilan namang libre ang pagproseso ng barangay clearance.

Ayon sa abogadong si Claire Castro sa programang "Usapang de Campanilla" maituturing na "optional" ang paniningil sa pag-isyu ng barangay clearance.

"Normally sa [iba] hindi [naniningil]. Pero 'yung ibang barangay parang meron. Depende sa amount [na kayang bayaran ng aplikante]," ani Castro sa programa.

Ayon kasi sa Section 152 ng Local Government Code o Republic Act 7160, maaaring maningil ang mga barangay ng fee sa pag-isyu ng clearance kung makatuwiran ang sinisingil na fee para rito.

Pero paalala ni Castro, sakaling singilin ito sa aplikante ay dapat mag-isyu ng resibo ang barangay, donasyon man ito o hindi.

"Pera 'yon, kung ano ang tinanggap mo na pera, still kailangan bigyan ng resibo... Kung magdo-donate 'yan, well and good, but still we have to issue the receipt," ani Castro.