Kahit sanay na sa pagko-comedy ang bunsong kapatid ni Maricel Soriano na si Mel Martinez, hirap pa rin daw siyang gawin ang mga comedy scenes sa horror-comedy movie na D’ Aswang Slayerz na pinagbibidahan niya.

“Actually, sa totoo lang mahirap talagang magpatawa, kasi ang hirap ng ano, eh. Mas madali sa akin ang magpaiyak sa totoo lang. Mas madali akong humugot kasi kapag drama," aniya. 

“I don’t know. It’s just that kapag comedy nahi-hit ko 'yung timing ba. Yeah, it’s a gift that I am really blessed with, kaya kapag ka comedy 'pag pinaghuhusayan mo at kahit pa comedy 'yan pinaghihirapan ko pa rin," dagdag niya. 

“Hindi siya 'yung parang comedy lang para madali – no, hindi ganun. Mahirap siya. 'Yung timing, 'yung effort, ;yung consistency. Ito ngang pelikulang ito sabi ko sa sarili ko, ‘T**n**a napagod ako dun, ah.’ Ang taas ng energy ko hanggang huli at buti nakakakaya ko, alam mo 'yun," pagpapatuloy niya. 

“Pero I’m very, very grateful sa project na ito. As [a] comedian ito talaga 'yung masasabi kong biggest project ko na ako talaga 'yung lead role. Kasi may mga ibang projects naman dati pero natataon sa drama, eh. Ito talaga 'yung parang full length na ako 'yung bida kumpara sa mga pa-support-support ko dati sa mga pelikula ni Direk Wenn (Deramas),” tuluy-tuloy na paliwanag ni Mel sa aming PUSH interview.

Aminado si Mel na nakakaramdam siya ng matinding pressure bilang bida sa pelikula.

“Siyempre nakaka-pressure.  Pero sabi ko nga, hindi lang naman kasi sa akin nakasalalay 'yan. Ang pinaka-selling factor nito is the end product itself, it’s the material. Kasi siyempre, kung maganda 'yung materyal magkakaroon tayo ng word of mouth at kakalat 'yan.

“Isa lang naman akong instrument on how this material came about at para maging maganda siya. So yon, naniniwala naman ako sa project, ang ganda naman. Don tayo magbe-base,” tugon ni Mel.

May pressure din bas sa kanyang part na maging kapatid ng Diamond Star?

“May pressure pa rin,” sabi agad ni Mel. “Kasi siyempre, being the brother of the Diamond Star it’s both an honor, number one, pero pangalawa, pressure. Kasi ang laki ng expectations ng tao. ‘Ay, kapatid ni Maricel Soriano 'yan, naku dapat magaling 'yan. Dapat ganito, ganyan,'" aniya. 

READ: Mel Martinez raids his sister Maricel Soriano’s bag

“So, parating may pressure kasi siyempre ayoko siyang mapahiya sa akin. That’s why I am always up on my toes whenever I act. Gusto ko siyang maging proud sa akin, di ba?" dagdag pa niya. 

Pag-amin naman ni Mel, gusto niyang maging proud sa kanya ang kanyang kapatid. 

“Hindi lang 'yun, siyempre gusto ko siyang maging proud sa akin the same na gusto ko ring mahigitan siya sa comedy. Siyempre may ano, eh, 'yun ang aspiration ko, eh. Kasi kung magiging kapatid ka ng Diamond Star, kailangang higitan mo ito hindi 'yung parang at par ka lang. Dapat, you know, eh, competitive ako. Ate sorry, ha,” seryosong pahayag ni Mel kasunod ng malakas natawa sa dulo.

READ: Maricel Soriano isn’t afraid to lose her fame: ‘Dapat lagi kang handa’

Kinakausap ba niya si Maricel para humingi ng advice sa acting?

"Hindi na ngayon. Kasi siyempre, nung bata pa ako ininstill na niya sa akin na, ‘Oh, siyempre nag-artista ka hindi dahil sa akin dahil ikaw sumali ka ng contest. Kaya lang siyempre, para tayong pinagbiyak na buko hindi mahahalatang magkapatid tayo," saad ni Mel. 

“Sinabi niya sa akin child star pa ako nito, ‘Etong pag-aartista mo, huwag mo akong gamitin. Gusto ko gumawa ka ng sarili mong pangalan.’ Kaya kung napansin mo noon forever siyang nasa Channel 2 ako naman nasa channel 7. Because I don’t wanna use her. I don’t wanna be her shadow kaya nagsumikap din ako na I have to establish my own identity,” deklara pa ni Mel.

Ipapalabas na sa mga sinehan sa March 22 ang D’ Aswang Slayerz na prinodyus ng Amartha Entertainment Productionat mula sa ilalim ng direksyon ni Ricky Rivero. Kasama rin sa pelikula sina Sharmaine Arnaiz, newcomer-teenstar Athalia Badere, and social media influencers Magdalena Fox and Christian Antolin.