Isang lalaking nagkunwaring customer ang nangholdap sa isang donut shop sa Makati City noong Sabado ng umaga.

Sa CCTV footage, makikitang naka-bonnet pa ang lalaki na nag-order din ng donut.

Pero bigla itong naglabas ng baril at ipinatong sa counter habang nakatutok sa service crew.

Ayon kay SPO2 Romeo Peñaflor, pinagbantaan ng suspek ang mga nasa counter kung hindi maglalabas ng pera.

Habang tumatawag ng tulong sa telepono ang isang staff, pinabuksan ng lalaki ang kaha at inutusang ilipat ang pera sa dala niyang supot.

Nalimas niya ang P11,000 laman ng kaha.

Tumanggi namang magbigay ng pahayag ang pamunuan ng donut shop.

Nagbukas ng hotline ang Makati police sa sinumang makapagbibigay ng impormasyon o pagkakakilanlan sa holdaper. – Umagang kay Ganda, 21 June 2017