Umabot na sa 20 bahay ang naapektuhan sa dalawang landslide sa Zone 3, Barangay Burabod, Libon, Albay nitong Miyerkules at Huwebes dahil sa paghagupit ng bagyong Kristine.

Sa landslide nitong Miyerkules, ayon kay Audrey Reolo na siyang nakapag-video sa pangyayari, katitigil lamang ng malakas na pag-ulan nang magsimulang bumigay ang lupa at umagos ang putik mula sa mataas na lugar na nasa likod ng mga bahay.

Umabot ito sa mga nakahilerang bahay sa gilid ng highway at tinatayang nasa 10 dito ang naapektuhan.

Ilang bahay sa Libon, Albay, lubog sa baha

Wala namang naiulat na nasaktan sa insidente dahil nasa labas ang mga nakatira at una nang lumayo nang mapansin ang nagbabantang pagguho ng lupa.

Inilikas ang mga apektadong residente sa evacuation center sa San Vicente Elementary School.

Subalit nitong Huwebes ng madaling-araw, muling nagkaroon ng landslide sa parehong lugar habang nagsasagawa ng clearing operations ang isang farmers' association at ang mga tauhan ng gobyerno.

Hanging bridge sa Pio Duran, Albay, bumagsak dahil sa baha

Nadagdagan pa ang mga bahay na natabunan ng lupa na tinatayang 20 na ang kabuuang bilang.

Ayon sa kapitan ng barangay na si Erwin Perez, isang 60-anyos na lalaki ang nawawala.

Nagsasagawa pa ng search and rescue operation ang mga awtoridad para mahanap ang biktima.

KAUGNAY NA ULAT: