Walang naitalang pinsala sa mga pangunahing gusali sa Bagamanoc, Catanduanes matapos itong yanigin ng may 6.1 magnitude na lindol lagpas alas-5 ng umaga nitong Miyerkoles.

Ayon kay Fire Officer 1 Martin John Fernandez, chief administrative officer at public information officer ng Bureau of Fire Protection Region 5 - Bagamanoc, naramdaman sa kanilang istasyon ang lakas ng lindol.

Sa utos ni SFO1 Richard Cabrera, officer-in-charge ng BFP R5 Bagamanoc, ay agad silang naglunsad ng inspeksyon sa mga pangunahing gusali sa sentro ng munisipalidad.  

•Magnitude 5.3 na lindol sa Quezon, nadama sa Bicol Region

"Isinuggest ni sir na mag-ocular inspection para makita 'yung damage tsaka kung sakaling may nangangailangan for rescue operations ay maagapan namin. Since maaga pa naman po, para kung sakaling may damage 'yung mga structures especially 'yung schools ay maiwasan na pong papasukin yung estudyante kung kinakailangan," ani Fernandez.

"Upon inspection po is wala naman na visible damage as of today. Tinitignan pa namin kung may lalabas na mga damages."

"Wala naman reported damages yung mga inspected sturctures namin, walang injuries, thankfully wala namang nabagsakan ng kung ano o nasirang structures."

•Surigao del Sur niyanig ng 6.8 magnitude na lindol

Ang mga gusali na kasama sa ocular inspection ay ang municipal hall, multi purpose covered court, Central Elem. School, Rural Development High School, Santa Teresa Bridge na nadurugtong sa Poblacion papuntang Virac, at ang St. Anthony of Padua Parish Church.

 Paliwanag ni Fernandez ito ang mga siniyasat na mga gusali dahil dito mas madalas na maraming tao ang nagtitipon-tipon. — Dabet Panelo, ABS-CBN News