Nakaranas ng hailstorm o pag-ulan ng yelo ang mga residente ng Atok, Benguet pasado alas-3 ng hapon noong Sabado de Gloria, ika-19 ng Abril 2025.

Isa sa mga nakasaksi ng hailstorm ay si Bayan Patroller Madelle Sarmiento, isang camper mula Nueva Ecija.

Aniya, noon lang niya naranasan ang pag-ulan ng yelo sa Atok kahit ilang ulit na siyang bumisita sa lugar.

Dagdag pa niya, ang pag-ulan ng yelo ay nagdulot ng kakaibang lamig sa kanilang camping.

Sa weather advisory ng PAGASA, mula ika-18 ng Abril hanggang 20, nagkaroroon ng thunderstorms sa Atok dahil sa "easterlies" o ang hangin na nanggagaling mula sa silangan papuntang kanluran.

Ayon kay ABS-CBN News resident meteorologist Ariel Rojas, umuulan ng yelo kapag may malakas na thunderstorm.

"Lumalaki nang lumalaki ang mga nagbabanggaan at nagdidikitang maliliit na tipak ng yelo sa loob ngg thunderclouds. Bumabagsak sila bilang hail kapag masyado nang mabigat," aniya.

"Kadalasang kasinglaki lamang ng holen ang hail sa Pilipinas dahil mainit sa bansa. Mas madalas namang matunghayan ang hailstorms sa matataas na lugar kagaya ng Atok, Benguet dahil mas malapit ang mga ito sa base o ibaba ng ulap," dagdag ni Rojas.