TV PATROL: 2 motorsiklo nagsalpukan; motorsiklo nabangga ng pickup truck sa Ilocos Sur

Sapul sa CCTV ang salpukan ng dalawang motorsiklo sa kahabaan ng national highway sa Barangay Taleb, Bantay, Ilocos Sur noong Biyernes ng gabi. 

Sa video, lumabas sa intersection ang isa sa motorsiklo para lumiko pakaliwa. Saktong paparating ang isa pang motorsiklo, at tuluyan itong binangga. 

Tatlo ang sugatan sa insidente na agad dinala sa pagamutan. 

Sa imbestigasyon, nasa impluwensiya ng alak ang rider at ang angkas ng sumalpok na motorsiklo. Mabilis umano ang takbo nito at wala ring ilaw. Wala ring suot na helmet ang rider nito. 

Sa Ilocos Sur pa rin, nabangga naman ng isang pick-up truck ang isang motorsiklo sa Barangay Catayagan sa bayan naman ng Sta. Lucia noon ding Biyernes. 

Nakunan sa video na paliko ang pick-up truck, pero nag-overtake pa rin ang kasunod na rider. Dito na nasapul ang motorsiklo. 

Sugatan ang rider at kanyang angkas na tumilapon sa lakas ng pagkakabangga. TV Patrol, Lunes, 14 Hulyo 2025