Patay ang isang lalaki matapos pagbabarilin ng riding-in-tandem sa Barangay Sulangan sa Dumangas, Iloilo noong Sabado ng madaling araw. Sa CCTV video, dumating sa lugar ang biktimang nakamotorsiklo, at may angkas na kaibigan. Kasunod nila ang mga lalaking nakamotorsiklo rin. Bumaba ang nakaangkas na suspek at pinagbabaril ang biktima. Ilang beses pang pinaputukan ng salarin ang biktima kahit nakabulagta na. Sa imbestigasyon ng Dumangas Municipal Police, galing ang biktima sa pagdiriwang ng bisperas ng piyesta at ihinatid ang kaibigan pauwi. Isinugod siya sa ospital, pero hindi na umabot nang buhay. Iniimbestigahan na ang motibo at kung sino ang mga sangkot sa pamamaril. TV Patrol, Lunes, 7 April 2025