MAYNILA -- Patay ang isang apat na taong gulang na bata matapos bugbugin at saksakin ng karelasyon ng kanyang ina sa Bgy. Lankaan 2, Dasmariñas Cavite, Biyernes ng madaling araw, April 4. 

Ayon kay Police Captain Polly Padios, Chief Investigation ng Dasmariñas Police, tatlong taon nang magkarelasyon ang suspek at ang nanay ng biktima. 

Dalawang taon naman nang naiwan sa pangangalaga ng suspek ang bata dahil naging OFW at nagtrabaho bilang domestic helper sa Cyprus ang nanay ng biktima. 

TV PATROL: Bata patay matapos bugbugin ng karelasyon ng ina

"Yun nanay ay nasa ibang bansa so yung bata ay inihablin sa partner. Actually ang nagreport ay tiyuhin ng bata. Nakatira sa iisang bahay kung saan bandang alas otso ay naginuman itong suspect at kapatid ng isang reportee natin," sabi ni Padios. 

"Nagsara siya [tiyuhin] ng gate nung natapos ang inuman, tapos nakarinig siya ng iyak ng bata. Doon sa pagiyak ng bata, sinilip nalang niya sa may bintana sa kwarto ng biktima natin kung saan nakita yung suspect na pinapalo itong biktima," dagdag niya. 

Alas tres ng madaling araw nang makita ng suspect at nang iba pang kaanak ng biktima na wala nang buhay ang bata. 

"Gumising itong suspect ng 3 am. Siya yung nagsabi na parang wala nang malay, na parang patay na. Gumising sila, pumasok itong complainant at witness, doon nila nalaman na patay na yung bata," sabi ni Padios. 

Agad inaresto ng mga taga-barangay at mga pulis ang suspek. 

Ayon naman sa tiyuhin ng biktima na si Jester Balgos, matagal na nilang sinusumbong sa nanay ng biktima ang ginagawang pagmamaltrato ng suspek. 

TV PATROL: Tatlong bata patay sa sunog sa Cebu City 

"Tuwing kakain sila at mabagal ang kain ng bata, pinapalo niya ng hanger. Tapos nung hindi pa mag-iisang linggo may latay na sa likod kaya sinumbong na namin sa nanay," sabi ni Balgos. 

Tumanggi naman magbigay ng pahayag ang suspek. 

Nakakulong na sa Dasmariñas Police Station ang suspek na nahaharap sa reklamong murder.