Sumalpok ang isang kotse sa supermarket sa Solano, Nueva Vizcaya, Martes ng gabi. 

Sa imbestigasyon, magpa-park sana ang kotse sa kanlurang bahagi ng parking area ng supermarket sa Barangay Quirino.

Napansin ng drayber na mataas ang paradahan kumpara sa kalsada at para maiwasang masaldak o sumabit ang ilalim ng sasakyan ay diniinan umano niya ang silinyador, dahilan kaya biglang umarangkada ang sasakyan.

6 sugatan matapos sumalpok ang sinasakyang kotse sa poste sa Tanay

Tumalon ang kotse sa tire stopper o harang sa gulong ng parking space saka dumiretso papasok sa establisyemento.

Nabasag ang dalawang glass panel at nahinto lang ang sasakyan nang sumadsad ito sa Customer Service Cubicle.

Tatlong customer ang nasugatan na dinala sa Region 2 Trauma and Medical Center.

Isinugod din sa ospital ang drayber ng kotse na sisenta’y uno anyos na babae na nakaranas ng paninikip ng dibdib.

Patuloy ang imbestigasyon sa insidente.