Isa ang patay habang 39 ang sugatan matapos bumangga ng isang pampasaherong bus sa arko o boundary marker ng La Union at Benguet Huwebes ng hapon. 

Sa lakas ng pagkakabangga sa arko na gawa sa semento, nayupi ang harapang bahagi ng bus at naipit ang driver at kunduktor nito. 

Agad na rumesponde ang rescue teams mula sa dalawang probinsya at isa-isang inilabas ang mga sugatang pasahero. 

Inabot naman ng gabi bago nailabas ang naipit na driver at konduktor. Ayon sa pulisya, papuntang La Union ang bus nang lumihis ito ng linya, at tuloy-tuloy na bumangga sa arko ng Sablan, Benguet at Burgos, La Union. 

Patuloy pa rin ang imbestigasyon ng mga awtoridad sa insidente. Agad dinala sa pagamutan ang mga sugatan Kabilang ang pitong buwang gulang na sanggol at ilang senior citizen. TV Patrol, Biyernes, 25 Abril 2025