MAYNILA -- Natagpuan ng mga awtoridad ang bangkay ng isang hindi pa nakikilalang lalaki sa gilid ng kanal sa Barangay Cupang, Antipolo nitong Miyerkules. 

Ayon sa Calabarzon police, isang residente ang nakakita sa bangkay ng lalaki na duguan ang ulo, bandang alas-2:25 ng madaling-araw. 

Agad rumesponde ang mga tauhan ng barangay at Antipolo City Police Community Precinct 1 sa pinangyarihan ng krimen.

Sa CCTV mula sa barangay, makikitang naglalakad ang apat na lalaki sa Purok 4.

Maya-maya pa, narinig na sa CCTV na may nagsabi na “please wala akong kasalanan,” kasunod ng tatlong putok ng baril.

Makalipas ang ilang minuto ay tatlo nalang sa mga lalaki ang naglakad paalis sa lugar.

Patuloy pang iniimbestigahan ng pulisya ang insidente pero kinumpirma ng mga taga barangay na hindi residente sa lugar ang biktima.