Bacolod City Hall. ABS-CBN News/File

BACOLOD CITY — Umabot na sa tatlo ang patay habang 16 ang sugatan nang banggain ng isang Multi Purpose Vehicle ang  isang tricycle at madamay pa ang mga nagpu-prusisyon sa highway ng Barangay Alangilan sa Bacolod City nitong Biyernes Santo.

Ayon sa PNP, kinilala ang namatay na sina Jonel Solano na isang lay minister. Siya ang nagmamaneho ng tricycle na nabangga ng MPV.

Patay rin ang dalawa pang sakay ng tricycle na kinilalang si Gilven Tanique na isang barangay tanod at isang Dynah Plohinog.

Prusisyon sa Bacolod City, binangga ng sasakyan; 2 patay, 9 sugatan

Bago ang insidente, una nang nahimatay sa prusisyon ang biktimang si Plohinog. Si Tanique naman ang nagbuhat sa kanya para maisakay sa tricycle.

Ayon kay Police Col. Joeresty Coronica na hepe ng Bacolod City Police Office, pabalik na sa unahan ng prusisyon ang tricycle nang mabangga ng isang Innova na minamaneho ni Jagpreet Singh, isang Indian national.

Matapos mabangga ang tricycle tumilapon ito sa PNP patrol car at nasagasaan ang mga nasa unahan ng prusisyon.

Samantala, kinumpirma ni Coronica na nag-positibo sa alcohol test ang Indian national na nagmamaneho.

Pero itinanggi ni Singh na naka-inom siya.  Pain reliever lang daw ang ininom niya.  

Dagdag pa ni Singh, naagaw ng tricycle ang kanyang lane kaya niya ito nabangga. 

LTFRB: Kaskaserong driver sa La Union bumiyahe pa rin kahit viral na

Tumakas lang daw siya dahil natakot siya sa dami ng tao na naroon sa insidente.

Sa mga isinugod sa ospital, ayon sa PNP, 13 pa ang nananatili sa pagamutan habang tatlo naman ang nakalabas na.

Ayon sa PNP, mahaharap sa kasong reckless imprudence resulting in multiple homicide, multiple physical injuries at damage to property si Singh.

IBA PANG ULAT