MAYNILA — Bumiyahe pa rin ang kaskaserong driver sa La Union kahit nag-viral na ito sa social media, sabi ng Land Transportation Franchising and Regulatory Board ngayong Miyerkules.

Ani LTFRB spokesperson Ariel Inton, in-impound na nila ang bus na ginamit ng sinasabing kaskaserong driver dahil "bumabiyahe pa rin" aniya ang driver kahit viral na siya.

Sa isang viral video, maririnig na umiiyak at nagmamakaawa ang isang ginang na ibaba na sila ng kaskaserong bus driver dahil sa delikadong pagmamaneho nito. Ang iba pang pasahero ay galit na pinapatigil ang bus.

TV PATROL: Mga pasahero ng bus nagmakaawa sa kaskaserong driver sa La Union

Galing ng Vigan, Ilocos Sur at papuntang Carmen, Pangasinan ang bus na may higit 30 sakay.

Dahil dito, agad sinuspinde ng LTFRB Region-1 ang bus operator. Isasailalim din sa mandatory drug testing ang driver at konduktor ng bus. 

Pumalag naman ang driver ng bus at sinabing mabagal lamang ang kanyang takbo. Giit ng driver na si Louie Burgos, ang bus sa kanilang harapan ang nanggitgit at umiwas lang siya.

Ayon naman sa LTFRB Region-1 office, masusi nilang iimbestigahan ang insidente at aalamin kung nalagay sa panganib ang buhay ng mga pasahero.  

LTFRB to crack down on ‘kamote’ drivers