TV PATROL: Basketball player sinapak ang referee sa CamSur

Sinapak ng isang basketball player ang referee sa gitna ng championship game sa liga ng Nabua National High School sa Camarines Sur noong Miyerkules. Hindi umano tinawagan ng foul ng referee ang manlalaro ng kabilang koponan. Sinugod ng nagrereklamong player ang referee, dinuro at sinapak. Maya-maya, sinuntok din ng isa pang kagrupo ng nagreklamong player ang referee sa likuran. Binalikan ng nagreklamong player ang game official at muling sinapak kaya bumagsak ito sa court. Kinondena ng  Samahang Basketbol ng Pilipinas Bicol Chapter ang anila'y kawalan ng respeto ng ilang player sa SBP-accredited referee. Magsasampa umano ang grupo ng pormal na reklamo laban sa mga nanakit na players. Hinimok din nito ang Nabua National High School Alumni Basketball League na tumulong sa kanilang imbestigasyon. TV Patrol, Martes, 1 April 2025