Isang kandidato sa pagka-alkalde sa isang bayan sa Sulu ang pinaghahanap ngayon ng mga awtoridad dahil sa kasong pagpatay.

Ika-27 ng Marso nang ilabas ng Regional Trial Court Branch 32 ang Warrant of Arrest para kay Al-Nednyl Amsad Tulawie na tumatakbo sa pagka-alkalde sa bayan ng Panamao sa Sulu.

Si Tulawie ang sinasabing pumatay sa tatlong magpipinsan sa Barangay Tetuan noong Pebrero 7, 2025 matapos umanong magka-alitan sa isang bar.

Sa surveillance video ng Barangay Tetuan makikita ang mga biktima na sakay ng isang motorsiklo nang harangin ng suspek at mga kasamahan nito na sakay naman ng dalawang SUV.

Bumaba ang suspek at pinagbabaril ang tatlong biktima saka tumakas mula sa crime scene.

Ayon kay PCol. Fidel Fortaleza, Acting City Police Director ng Zamboanga City Police Office, inaalam na  nila ang posibleng kinaroroonan ngayon ni Tulawie.

Walang inirekomendang piyansa ang korte sa kaso.