Binabaha na ang ilang bahagi ng Quezon province partikular ang Lamon Bay area o ang 4th District ng lalawigan dahil sa mga pag-uulan dala ng umiiral na shear line.

Kabilang sa mga bayan na naapektuhan ay ang Tagkawayan, Calauag, Ginayangan, Gumaca  at ang mga island municipalities ng Alabat at Quezon-Quezon na  lahat ay nasa timog-silangan ng lalawigan.

Hanggang ngayon, halos tatlong araw na ang mga pagbuhos ng ulan na nararanasan sa buong probinsya.

Shear Line, northeast monsoon to drench Luzon

Sa Tagkawayan, naabot na ng baha ang eskwelahan sa Barangay Kinatakutan matapos umapaw ang katabi nitong malaking  ilog.

Ganoon din ang Plaza Rizal Elemetary School sa bayan ng Gumaca na pinasok na rin ng tubig ang mga silid aralan.

Sa Calauag, wala na ring madaanan ang mga motorista at muntik pang maanod ng baha ang isang nagmomotorsiklo na tinangkang tumawid sa kalsadang mataas ang baha sa barangay Viñas.

Tumataas na rin ang level ng tubig sa ilang  mga lugar ng Alabat, Pagbilao, at Atimonan.

Maraming bayan na rin kabilang ang Lucena City ang suspendido ang face to face classes ngayong araw.

Wala namang naiulat pa na inilikas pero patuloy ang paalala ng PDRRMO at mga LGU sa mga residente na maging alerto sa posibleng mga pagtaas pa ng tubig at flash floods at mga landslide sa mga mapanganib na lugar.

Sa pinakahuling weather advisory ng PAGASA at ng NDRRMC nitong Miyerkoles ng umaga, nakataas ang orange rainfall  warning sa lalawigan ng  Quezon.