Sugatan ang isang 25-anyos na college student matapos siyang pagnakawan ng cellphone at kaladkarin ng isang rider sa EDSA North Avenue, sa Quezon City.

Kita sa viral video sa social media na ilang minuto ring nakaladkad sa may southbound lane ng EDSA ang biktima bago siya nahulog mula sa motorsiklo.

Nakipagkita ang biktima na si Janine Balanza sa suspek na nakausap online sa isang mall sa North Avenue noong April 20 upang ibenta ang cellphone sa halagang P19,800 na para sana sa kanyang tuition sa last sem nito sa kolehiyo.

Nagulat si Balanza na pinasakay siya ng rider sa isang motorsiklo para umano makapagwithdraw sila ng pera sa ATM na ipapambayad sa binebentang cellphone. Sinubukan nitong makababa matapos kutuban, ngunit may sumabit sa kaniyang gamit o damit dahilan na makaladlad nang patakbuhin ng suspek ang kaniyang motor.