MAYNILA — Nilamon ng apoy ang isang residential area sa Manuyo Uno, Las Piñas City pasado alas-4 ng madaling-araw nitong Martes, May 6.

Umabot sa ikalawang alarma ang sunog ng 4:58 a.m. at idineklarang fire under control ng 5:54 a.m.

Ayon sa isang nasunugan na si Rodolfo Torente, wala silang naisalbang gamit. Kwento niya, sa bahay umano ng kanyang pinsan nagsimula ang sunog.

“Nanggaling po yun sa bahay ng pinsan ko... Eh ano yun lumang bahay,” sabi ni Torente.

Sinubukan pa niyang magsalba ng gamit pero tinawag na siya ng kanyang anak sa pangangambang hindi sila makalabas dahil sa pagkalat ng apoy.

“Inano na ako ng anak ko... kasi wala kaming tatakbuhan eh, lisang eskinita lang,” dagdag pa niya.

TV PATROL: 5 sugatan, nasa 200 pamilya nawalan ng tirahan sa sunog sa QC

Kwento naman ni Melodina Bautista, ginising lang siya ng kanyang anak dahil sa sunog. Wala rin silang naisalbang gamit.

“Pagbaba ko, nabagsakan po ako ng parang tela— mainit,” kwento ni Bautista na nagtamo ng paso sa kanyang ulo.

Naapula na ang sunog ng 7:33 a.m.

3 patay sa magkahiwalay na sunog sa Rizal

IBA PANG ULAT