Dalawang bar, imbakan ng alak nasunog sa Malate

MAYNILA — Natupok ang dalawang bar at isang imbakan ng alak sa Malate, Manila nitong Huwebes ng madaling-araw. 

Ayon sa barangay kagawad, bigla nalang nagtakbuhan ang mga kustomer ng mga bar sa Barangay 697, Zone 76 nang makarinig ng putok.

“Yung talagang kasagsagan ng sunog, may mga pumuputok eh siguro yung mga kuryente na shortcircuit na,” sabi ni barangay kagawad Paquito Perono. 

Naging pahirapan ang pag-apula ng apoy dahil sa makapal na usok at mga linya ng kuryente.

“May kuryente po, may possiblity na ma kuryente ang ating mga bumbero kaya medyo hirap din sa pagpasok,” sabi ni Bureau of Fire Protection-Manila station 4 commander F/SInsp Leslie Ann Ramos. 

Sa inisyal na imbestigasyon ng BFP, lumabas na sa likurang bahagi ng isa sa mga bar nagsimula ang apoy. 

Umabot sa ikalawang alarma ang sunog at 3:54 a.m. idineklara ang fire out. Walang naiulat na nasugatan o nasawi sa insidente. 

Inaalam pa ng BFP ang halaga ng napinsala ng sunog.