Nakabinbin pa rin sa Senado ang impeachment charges laban kay Bise Presidente Sara Duterte, taliwas sa ipinalalabas ng isang post na diumano’y ibinasura na ang mga ito ng Korte Suprema.

Ginamit ng post ang bahagi ng programang “Sa Ganang Mamamayan” ng Net 25 noong Marso 25, 2025. Nilapatan ang ulat ng tekstong “Ibinabasura na ang inihaing Impeachment” at ng larawan ng bise presidente.

Pero ang report ng naturang media company ay hindi tungkol kay Duterte kundi tungkol sa pagbasura sa impeachment case laban kay South Korean Prime Minister at acting President Han Duck-soo noong Marso 24, 2025.

Sa orihinal na bidyo ng Net 25, nagsimulang banggitin ng host ang sinasabi niyang “kalalabas lamang na desisyon” sa 3:25 mark, pero naklaro lamang na ito ay tungkol sa impeachment laban kay Han sa 6:58 mark. Mahigit tatlong minutong nag-usap ang dalawang hosts tungkol sa detalye ng ibinasurang impeachment case ni Han pero hindi sinasabi kung sino ang sangkot dito.

Sinabi pa nila noong una na “Korte Suprema” ang umano’y nagbasura sa impeachment pero ang Constitutional Court ng South Korea, hindi ang kanilang Korte Suprema, ang nagbasura sa naturang kaso ni Han.

South Korea reinstates impeached PM Han as acting president

IMPEACHMENT TRIAL NI VP DUTERTE

In-impeach ng House of Representatives si Duterte noong Pebrero 5, 2025, sa kaparehong araw na pansamantalang inihinto ang sesyon ng Senado na magsisilbing impeachment court. Dahil dito, walang impeachment trial na magaganap hanggang Hunyo 2.

Escudero reiterates VP Sara impeachment trial cannot start while Senate on recess

Noong Pebrero 18, naghain si Duterte ng petisyon sa Korte Suprema para ipatigil ang kanyang impeachment trial ngunit wala pang desisyon ang Korte tungkol dito.

Sara Duterte seeks to block her impeachment trial

Noong Abril 6 ay nakabalik na sa Pilipinas si Duterte galing sa the Netherlands kung saan nakadetine ang kanyang ama na si dating Pangulong Rodrigo Duterte na nahaharap sa kasong crimes against humanity.

Sara Duterte back in PH after dad Digong's detention in the Netherlands

POLITICAL CRISIS SA SOUTH KOREA

In-impeach naman ng South Korean parliament si acting President Han noong Disyembre 27, 2024 dahil sa umano’y papel niya sa pagdedeklara ni dating Pangulong Yoon Suk Yeol ng martial law.

Rival protests planned in South Korea after second leader impeached

Si Han ang humalili kay Yoon na na-impeach at tuluyang napatalsik sa pagka-pangulo dahil sa pagdedeklara niya ng martial law noong Disyembre 3, 2024.

Samantala, dahil ibinasura ng Constitutional Court ang impeachment laban kay Han, magpapatuloy siya bilang acting president hanggang sa may maihalal na bagong pangulo ang bansa.

South Korea court upholds President Yoon's impeachment, strips him of office

Kung kayo’y may alam na kahina-hinalang social media page, group, account, o website, artikulo, larawan, o impormasyong ipinapakalat sa mga messaging app, maaring makipag-ugnayan sa aming email factcheck@abs-cbn.com o X account @abscbnfactcheck.