Nanawagan ng hustisya at dasal ang pamilya ni Val Dela Cruz matapos itong masama sa nasugatan sa nangyaring pag-aararo ng isang sasakyan sa ginanap na Filipino Street Festival sa Vancouver, Canada.

Ayon sa nakatatandang kapatid ni Val na si Mary Rose, pauwi na sana umano si Val kasama ang pamilya pero pansamantala itong dumaan sa tindahan para bumili ng lemon juice at ilang sandali lang ay binangga ang mga ito ng sasakyan na nagmula sa kanyang likuran.

Tumilapon umano si Val habang karga ang magdadalawang taon na anak na lalaki.

Kasalukuyang nasa Intensive Care Unit (ICU) pa rin at kritikal ang kalagayan ng anak ni Val habang siya naman ay nagkamalay na, ayon sa mga kaanak nito.

"Conscious naman po si Val at nakausap na namin. 'Yung baby 'yan lang po ang ano namin kasi ang kondisyon niya wala pa rin po nasa ICU pa," ani Mary Rose.

Hustisya naman ang panawagan ni Guillermo Dela Cruz, ama ni Val sa nangyaring trahedya sa kanyang anak at apo.

"Hustisya para mabigyan ng hustisya ang pagbangga ng taong 'yan dapat panagutin siya sa nangyari," aniya.