Arestado ang isang 33-anyos na top 2 most wanted sa Southern Police District (SPD) at top 1 most wanted din ng station level ng Paranaque City Police sa kasong pagpatay noong Linggo ng gabi, ika-13 ng Abril, 2025, sa Barangay Mambog V, Bacoor, Cavite.

“Natunton po namin to sa pamamagitan ng aming confidential informant na kung saan po ang ating accused ay pumayag na makipagkita sa lugar kung san namin nahuli itong aming accused,” Kwento kay PLt. Michael Guanzon, Officer-in-Charge ng Warrant and Subpoena Section ng Parañaque City Police Station.

Ayon kay PLt. Guanzon, ang akusado ay may isa pang kasabwat nang gawin ang krimen noong ika-20 ng Setyembre, 2024.

Pinagtulungan nilang saksakin ang biktima sa iba’t ibang parte ng kanyang katawan na naging dahilan ng kanyang pagkamatay.

Umamin din ang akusado sa krimeng ginawa pero hindi na idinetalye ang dahilan kung bakit niya ito nagawa. “Wala naman sinabi, basta 'yun lang parang napagtripan lang nila,” sabi ni PLt. Guanzon.

Dati na din umanong nakulong ang akusado sa mga kasong robbery at may kaugnayan sa ilegal na droga.

Hindi pa rin matukoy ng PNP ang kasama ng akusado sa pagpaslang sa biktima.

Paalala naman ng PNP sa mga may warrant of arrest na sumuko na at harapin ang kanilang kaso.