Matapos ang halos dalawang taon, nasakote na ng mga awtoridad ang isang lalaking wanted sa pagpatay sa 4 na indibidwal sa Navotas.

Ayon kay Police Colonel Renante Pinuela, Commander ng Northern Police District (NPD) Mobile Force Battalion, nasa most wanted list ng DILG, NCRPO, NPD at ng Navotas City Police ang akusado, na may warrant of arrest para sa kasong murder noong 2023.

"Ang napatay dito ay dalawang babae at dalawang lalaki at yung lalaki dito isa ay minor pa. It happened last May of 2023. So yung suspek na nahuli natin siya yung leader ng grupo," sabi ni Pinuela.

"Natagalan lang kami sa pagkuha [sa suspekj] dahil lumabas siya ng Metro Manila, we found out nasa Region 3, Bulacan, palipat lipat siya ng area.  Nasa subdvision siya, nangungupahan, so nasundan ng ating intel operatives at paalis sila ng bahay actually so nung nagpakilala ang mga puis natin, tumakbo at hinabol siya ng mga tropa," dagdag niya.

Huli sa CCTV na pinalibutan ng mga pulis ang itim na SUV sakay ang akusado at kanyang live-in partner habang palabas ng subdivision sa San Rafael, Bulacan. 

Nakumpiska sa kanila ang isang baril at mga sachet ng hinihinalang shabu.

Tumanggi namang magbigay ng pahayag ang dalawa na nasa kustodiya na ng Northern Police District. 

Bukod sa kasong murder ay nahaharap din ang lalaki sa reklamong illegal posession of firearms and ammunition in relation to the Omnibus Election Code, habang nasampahan na ng reklamong paglabag sa Comprehensive Dangerous Drugs Act ang kanyang live in partner.