Sumiklab ang sunog sa isang residential area, alas kwatro ng hapon sa Brgy. 353, Sta Cruz, Maynila nitong Biyernes. 

Umabot ang sunog sa ikalawang alarma bago ito natupok pasado alas otso ng gabi. 

Ayon sa barangay, nasa tinatayang 30 bahay ang nasunog at 50 hanggang 60 ang pamilyang naapektuhan.

Kwento ng residenteng si Randale Llenaresas, nanunuod siya sa loob ng kaniyang bahay nang makaamoy  ng usok. 

"So bumaba ako ng bahay lumabas para icheck. Nung icheck ko ang laki na ng sunog sa katabi namin. Yung pinsan ko ginising. Siya lang naligtas ko. Yung aso, mga santo hindi na," sabi ni Llenaresas.

Ayon sa mga residente, isang bentilador ang pinagmulan ng sunog.

"Sabi sa bentilador daw na pumutok tapos dun sa bentilador may gas daw at the same time," dagdag pa niya.

Sa Brgy 106, sa Tondo, Maynila naman, umabot sa ikatlong alarma ang sunog sa isang residential area na nagsimula pasado alas singko ng hapon. Naapula ito 5:53pm.

Ayon kay F/Sr. Inspector Alejandro Ramos, Chief Investigator ng BFP Manila, walang naitalang patay sa parehong sunog sa Maynila at kasalukuyang pang iniimbestigahan ang mga insidente.

Sa Caloocan City, umabot sa second alarm ang sunog sa isang residential area sa M Hizon St., Brgy 63, pasado alas-11 ng umaga, Pebrero 14, 2025.

Ayon kay Fire Officer 2 Romeo Cacay ng Caloocan City Fire Station, 11 firetrucks ang rumesponde sa sunog na idineklarang fire under control ng 5:55 p.m.

Hindi pa tapos ang mapping at imbestigasyon sa sunog, ayon kay Cacay. 

Nagbahagi naman ng bidyo si Bayan Patroller Jomer Villamor kung saan makikita ang nasusunog na kabahayan. Kuha ang bidyo mula sa ikaapat na palapag ng bahay ni patroller sa P. Zamora St. Caloocan City.