Sumiklab bandang ala-una ng hapon nitong Sabado ang sunog sa mga paupahang apartment sa Barangay Pasong Putik, Quezon City. 

Ginagamit na boarding house ng mga manggagagwa sa isang shop na gumagawa ng mga bintana ang mga apartment. 

Ayon kay Warfrey Oculam, nagsimula ang sunog sa kwarto ng kaniyang inuupahang apartment.

Wala umanong tao sa apartment dahil abala sila sa trabaho nang mapansin na lamang nila na makapal na ang usok.

Hinala ni Oculam, sa linya ng kuryente nagsimula ang apoy.

 "Nginatngat siguro ng daga, dami kasing daga sa taas, baka doon nagsimula. Wiring yun, hindi naman kami nagluluto sa taas, patay  din lahat ng ilaw,” sabi ni Oculam.

Apat na pintong apartment ang natupok kung saan nasa 16 boarders ang apektado. Alas-2 na ng hapon na nang maideklara na fire out ang sunog na umabot sa unang alarma.