MANILA — Arestado ang isang lalaki matapos pagnakawan ng mga gamit ang isang call center agent sa Barangay Paang Bundok, Quezon City nitong Martes ng madaling araw.

Kwento ng biktima na si alyas Grace, papasok na sana siya ng trabaho nang harangin siya ng lalaki na nakasakay sa isang AUV. 

Kita sa CCTV sa lugar, na hinablot ng lalaki ang kanyang mga gamit hanggang sa bumagsak sa kalsada ang biktima.

“Papasok po ako ng trabaho…palabas po ako ng street namin, sa kanto kasi dapat ako sasakay. Tapos bago ako makalabas ng kanto para makasakay, meron pong sasakyan na huminto sa tabi ko po tapos mayroong isang lalaki na bumaba umikot siya sa likod at binlock ang way ko at kinuha yung gamit ko. Tinulak niya ako tapos napahiga ako at bumagsak nalang po sa kalsada,” sabi ng biktima. 

“So nakuha po niya ung mga gamit ko lahat tapos tumakbo nalang din ako pauwi ng bahay kasi po mas malapit yung way ko sa bahay tapos tiningnan ko nalang din po yung plate niya para lang po alam ko,” dagdag niya.

Agad niyang idinulog sa pulisya ang nangyari at doon nagkasa ng operasyon ang La Loma police. 

“Agad po tayo nagbuo ng tracker team para po magsagawa ng follow up operation nagresulta naman po ito ng pagkakaaresto suspek through CCTV backtracking,” sabi ni PLtCol. Ferdinand Casiano, station commander ng La Loma police. 

“Sa loob lamang po ng 10 oras sa pakikipagtulungan ng ating barangay ating cctv natunton agad yung suspek so natunton natin location niya,” dagdag niya. 

Hindi narecover ng pulisya ang natangay na ATM cards, ID, P1,500 cash at cellphone ng biktima. 

Nakuha ng PNP ang sasakyan na ginamit ng isa sa mga suspek sa krimen. 

Nakakulong na ngayon sa La Loma police ang isa sa mga suspek habang pinaghahanap pa ang kanyang kasamahan.

“No comment na lang po,” sabi ng suspek. 

Mahaharap siya sa reklamong robbery snatching.