Makati LGU binigyan ng bagong istasyon ang ilang pulis at bombero. Screenshot mula sa Facebook Live ng My Makati Facebook page

MAYNILA — Pinangunahan ni Makati Mayor Abby Binay ang ceremonial opening ng Makati Central Police Station at Makati Central Fire Station sa Malugay Street at Buendia Avenue sa Barangay San Antonio nitong Lunes, Hulyo 1.

“Ito naman kasi alam namin na kulang ang pondo ng DILG kaya todo suporta kami sa pulis tsaka sa fire kasi siyampre importante sa Makati is yung peace and order. Kasi para ma engganyo ang mga negosyo dito sa Makati, we have to make sure that we give ample support peace and order both for the police and the fire," sabi ni Binay. 

Dagdag ng alkalde, bago pa ang pandemya sinimulan ang konstruksyon ng mga gusali kaya’t natagalan itong matapos dahil sa antala nito. 

“Ang ganda ng location ng police and fire, very strategic siya. It’s just a few meters away from the old police station but I think the location is much better kasi nasa kanto talaga siya ng Buendia at saka ng Malugay," sabi ni Binay.

Nasa 3,249-square meters ang tatlong palapag na police station na gawa sa bakal at konkreto na may secure detention cell na may CCTV at fire detection at alarm system. Bukod rin ang mga opisina ng mga hepe ng pulisya. May nakalaan na mga opisina para iba’t ibang divisions at sections.

Mayroon ding women and children protection desk, complaint desk, operations center, training room and conference room, and a clinic ang gusali.

Nasa 1,778-square meters naman ang tatlong palapag din na fire station na gawa rin sa bakal at concrete mat foundation at lightweight wall materials. Kayang iparada ang apat na firetrucks sa parking at mayroong fire pole.

May sariling opisina ang city fire marshall, administration at district officers. May air condition, exhaust fans, CCTV system, fire detection at alarm system, fire extinguishers, voice and data system, at public address system ang parehong gusali. May solar panel din ang mga ito.

“Ovelwhelming and kami ay napakasaya, at last itong aming matagal na naming pangarap na magkaroon ng bagong Cental Fire Station, can occupy around 100 personnel dito sa building natin ito… in behalf of Makati City Fire Station kami po ay taos pusong nagpapasalamat sa ating butihing mayor for providing us this building, this fire station," sabi ni FSupt. Jeffrey Atienza, city fire marshall ng Makati City BFP. 

“I would like to thank the Makati LGU for donating this new building… Starting now unti unti po tayong lilipat so hindi naman pare parehas na lilipat tayo so unahin naitn yung tactical operations center, para maiset niya kasi importante yung communications center natin. So by July 15 fully operational na," sabi naman ni PCol. Edward Cutiyog hepe ng Makati City police.

Mula sa city executive budget ngayong taon, P69.2 milyon at P15.8 milyon ang inilaan ng Makati sa police department at fire department nito.