MAYNILA — Mahalaga ang ginagampanang papel ng campus journalists bilang tagasulong ng mga balita o impormasyon sa loob o labas man ng paaralan.

Pangunahing batas ng peryodismong pampaaralan sa Pilipinas ang "Campus Journalism Act of 1991" na layong maprotektahan ang mga campus journalist at mapaunlad ang kanilang kakayahan–na iniakda ni dating senador at media man Orlando "Orly" Mercado.

Sa ilalim ng nasabing batas, hindi puwedeng ma-expel sa paaralan ang isang campus journalist dahil lang sa naisulat niyang article o pagganap sa kanyang tungkulin sa loob ng student publication.

Dagdag pa rito, may bahagi sila sa “subscription fees” na kinokolekta ng kanilang school administration na hindi maaaring harangin mula sa pondo ng paaralan at iba pang sources na nakalaan sa student publication.

Sa kabila nito, hindi pa rin nakaligtas ang mga campus journalist sa banta ng suppression sa loob ng mga paaralan.

Para kay Associate Professor Danilo Arao ng Department of Journalism sa University of the Philippines Diliman, mayroong mahalagang papel ang campus journalism sa paghubog ng opinyon ng publiko at sa mas malalimang pagsusuri ng mga importanteng isyu sa bansa.

Sinusulong ng ilang mambabatas at grupo na mapalakas ang batas lalo’t hindi na lang sa mga paaralan nakakaabot ang campus journalism kundi pati na rin sa social media.

– Ulat nina Andrei Angeles, Jamaica Bayaca, Jade Fernandez, Shannen Go, Rafael Lapore, Michael Francis Morales, at Mark Angelo Timbreza, Patrol ng Pilipino Interns

Philippines drops 2 places in 2024 Press Freedom Index

Journalism professors fight misinformation, disinformation

Mga estudyante bahagi ng pagkukuwento ng Patrol ng Pilipino bilang interns

AI tools sa pag-aaral, dapat ba ipagbawal? | Patrol ng Pilipino Playlist Vol. 28: Interns