Traffic comes to a halt at España Rotonda as the jeepney strike blocks three lanes of Quezon Avenue on April 16, 2024. Lou Vertucio, ABS-CBN News

MAYNILA — Mas pinili pa rin ng ilang mga tsuper na mamasada sa ikalawang araw ng transport strike bilang protesta sa franchise consolidation na bahagi ng Public Utility Vehicle Modernization Program.

Sa Commonwealth Avenue sa Quezon City, sunod-sunod ang dating ng mga jeep sa Don Antonio, kanto ng Luzon Avenue, Tandang Sora at UP Technohub.

Ito ang mga pampasaherong jeep na may ruta papuntang Fairview, North Avenue at Cubao at pabalik.

Sa Quezon Avenue naman, may mga jeep din ang patuloy sa pamamasada. Ito ang may biyaheng papuntang Welcome Rotonda, Santa Mesa at Aurora Boulevard.

Ayon sa ilang mga tsuper, miyembro sila ng mga kooperatiba kaya hindi na sila lumahok sa protesta. 

Ang ibang tsuper naman, kinailangan na mamasada para may maiuwing kita para sa kanilang pamilya. 

Samantala, tuloy-tuloy lang ang pagsakay ng mga pasahero sa bahagi ng Caloocan, lalo na sa rotonda sa Monumento.

Ang pagsali sa kooperatiba ay kasama sa mga rekisito ng franchise consolidation.

Ang franchise consolidation ay susundan fleet ng modernization, o ang pagpapalit ng sasakyan na gamit ng kooperatiba.

Tutol ang mga miyempro ng mga transport group na PISTON at Manibela sa franchise consolidation.

Masyado raw mahal ang mga minibus na ipapalit sa tradisyunal na jeepney at dahil sa mga usapin sa pagmamay-ari ng mga yunit na gagamitin ng kooperatiba.

Hanggang Abril 30 na lang makakabiyahe ang mga jeepney na hindi papaloob sa kooperatiba, ayon sa Land Transportation Franchising and Regulatory Board.