Isang sakong may lamang ilang bahagi ng katawan ng tao ang natagpuan sa labas ng tanggapan ng National Bureau of Investigation sa Bacolod City.

Ayon sa mga paunang ulat, isang magtitinda ang unang nakapansin sa sako sa labas ng gate ng opisina. Ayon pa sa tindera, inakala niyang frozen food ang laman ng sako na nahulog mula sa sasakyan ng NBI.

Matapos nito ay sinabihan niya ang isang NBI volunteer na dalhin ang sako malapit sa gate ng NBI office, saka sila tumawag ng isang empleyado para buksan ang sako.

Nang buksan ito, nakitang may laman itong putol na kaliwang braso, kaliwang binti at dalawang tenga ng tao.

Ipinagbigay alam na ng NBI sa pulisya ang insidente. Bumuo na rin ng isang task force para imbestigahan ito.