MAYNILA - Patay ang isang motorcycle rider matapos mag-counterflow at sumalpok sa kasalubong na sasakyan sa Skyway Stage 3 sa Quezon City.  

Ayon sa kuha ng Skyway Corp, pa-northbound sana ang lalaki nang mag-counterflow ito sa Balintawak Skyway Stage 3.  

Sinubukan ng traffic enforcer na pigilan ang rider pero nilagpasan ito ng motorista hangga't sa sumalpok siya sa isang sasakyan.  

Sa lakas ng pagkakabangga, tumalsik ang rider.

Lumabas sa imbestigasyon na lango sa alak ang motorcycle rider. Nasa 80 kilometers per hour din ang takbo nito, lagpas sa 60 kph na speed limit, ayon sa Skyway Corp.  

Dinala sa ospital ang lalaki, pero pumanaw rin kalaunan, ayon sa isang police report. 

Nagtamo naman ng minor injuries ang driver at babaeng pasahero ng sasakyan na nakabanggaan ng motorsiklo. 

Pinalalaahan ng mga awtoridad ang publiko na sumunod sa batas-trapiko.

“Una po sa gumagamit ng motorcycle, kailangan po natin ng tamang helmet, safety gears. Yung pag-counterflow, hindi po ina-allowed yan, talagang no, no po yan,” ani P/Capt. Jun Cornelio Estrellan ng Highway Patrol Group.