BRUNEI - Nagsama-sama sa  pagboboluntaryo ang mga Pilipino sa Brunei sa “Paws Up” Volunteer Day sa paglilinis ng dog shelter noong October 14 na inorganisa ng United Filipino Social Club o UFSC. 

Bahagi ito ng pagdiriwang ng World Animal Day na taunang selebrasyon na may layong itaas ang antas ng kalagayan at pag-aalaga sa mga hayop sa buong mundo.

Lumahok din sa nasabing event ang Embahada ng Pilipinas sa Brunei na kinatawan ni Consul Bernadette A. Mendoza.

Nagtulong-tulong din ang mga Pilipino sa pagbibigay donasyon at pagkain para sa mga aso sa shelter na naggkakanlong sa mahigit 100 rescued dogs.

Patuloy ang pagsuporta ng embahada sa mga programang nagsusulong ng pagkakaisa at pagmamalasakit na sumasalamin sa katangian ng mga Pilipino bilang mapag-alaga at mapagmalasakit sa mga hayop.