Bangkay nang nahanap Linggo ng umaga ang dalawa sa pitong mangingisdang nawawala mula Barangay Cato sa Infanta, Pangasinan.

Kinilala ang mga nakuhang bangkay na sina Christopher Mongje at Junjun Amor.

Noong Biyernes, tumulak ang isang grupo ng mangingisda para hanapin ang mga kasama.

Nagpadala ng isa pang bangka para sunduin ang mga bangkay matapos silang makitang palutang-lutang sa dagat, 92 milya ang layo mula sa Barangay Cato.

Ayon kay Johnel Pulido, isa sa mga nag-retrieve ng mga bangkay, naagnas na ang dalawang biktima dahil sa matagal na pagkakalubog sa tubig.

Walang Coast Guard na kasama ang mga mangingisda na lulan ng bangkang "John Paul II" para sa retrieval operation.

Naghihintay ngayon ang mga taga-Barangay Cato sa pagdating ng mga bangkay at umaasang buhay na makakauwi ang limang mangingisdang hindi pa rin nahahanap.

Nawala ang mga mangigisda matapos pumalaot noong Nobyembre 28 sakay ng bangkang "John Paul."

Sa kasalukuyan, limang mangingisda pa rin ang nawawala, na kinilalang sina Pedro Amor, Jomar Gamboa, Alfredo Bautista, Carding Mical, at isang kinilala sa pangalang "Jerry."