(UPDATED) Nakilahok ang ilang grupo at ilang naulila sa pagsisimula ng programa ng Catholic Bishops' Conference of the Philippines (CBCP) na tumututol sa extrajudicial killings.

Mga inang naulila nang dahil umano sa EJK, sumama sa prayer rally sa EDSA Shrine @DZMMTeleRadyo pic.twitter.com/zdui2B6nrG

— Zhander Cayabyab (@zhandercayabyab) November 5, 2017

Alas-3 ng hapon, nagdaos ng misa sa EDSA Shrine sa pangunguna mismo ni CBCP president Socrates Villegas.

Sa kaniyang sermon, nanawagan si Villegas sa mga gumagamit ng ilegal na droga na magbago dahil hindi pa huli ang lahat.

Sa mga kaanak naman ng mga pinatay na drug users sa umano'y kaso ng extrajudicial killings, sinabi ni Villegas na huwag magpadala sa simbuyo ng paghihiganti.

Arch. Soc Villegas: “Kapag hindi itinigil ang patayan, susumpain ng Diyos ang Pilipinas” @DZMMTeleRadyo pic.twitter.com/t3DyBsv38G

— Zhander Cayabyab (@zhandercayabyab) November 5, 2017

Pinaalalahanan din ni Villegas ang mga kababayan na pagsilbihan ang kapwa at hindi ang mga politiko.

Tinatayang nasa 2,500 ang bilang ng mga dumalo sa pagtitipon bandang alas-3 ng hapon, ayon sa Quezon City Police District.

Matapos ang misa'y nagdaos ng prusisyon bitbit ang imahen ng Our Lady of Fatima, imaheng dala-dala rin ng mga deboto noong 1986 EDSA People Power Revolution.

Nilinaw naman ng pangkat na Tindig Pilipinas na hindi politikal ang kanilang pagsali sa prayer rally.

Iginiit naman ng Malacañang na hindi rin nila tinatanggap ang nangyayaring extrajudicial o vigilante killings na iniuugnay sa giyera kontra droga ng administrasyon.

Palace statement on the Lord Heal Our Land Sunday pic.twitter.com/XHlswM2mHa

— Pia Gutierrez (@pia_gutierrez) November 5, 2017

Nais din nilang makipagtulungan sa Simbahang Katolika kaugnay sa kanilang kampanya kontra droga.

Kabilang ang misa, prusisyon, at cultural show sa mga serye ng aktibidad para sa "Lord Heal Our Land" o 33 araw na taimtim na pagdadasal na hiling ng CBCP para sa mga biktima ng extrajudicial killings.

-- Ulat nina Jeck Batallones, Zhander Cayabyab at Pia Gutierrez, ABS-CBN News