MANILA - Patay ang dalawang bata habang sugatan ang 14 iba pa matapos mahulog ang sinasakyang van sa kanal sa Southern Tagalog Arterial Road (STAR) Tollway sa Malvar, Batangas Lunes ng gabi.

Galing sa isang beach resort sa Anilao, Mabini at pauwi na sana sa Pasig ang L300 van ng mga biktima nang mag-overtake ito sa Kilometer 73 ng tollway.

Nagpagewang-gewang umano ang van nang mawalan ng kontrol ang driver na si Joseph Fernando hanggang sa mahulog sa malalim na bahagi ng kanal.

Kinilala ang mga nasawi na sina Janelle Anne Delanon, 9, at Jaylord Lance Delanon, 12.

Isinugod naman sa Mary Mediatrix Hospital sa Lipa ang 14 na nasugatang karamihan ay mga bata.

Posibleng sampahan ng patong-patong na kaso ang driver na sinasabing nakainom ng alak. -- Ulat ni Arnell Ozaeta, DZMM