DAVAO CITY- Sinagip ng City Social Services and Welfare Office ang 26 na mga Lumad na naninirahan sa tabi ng kalsada sa MacArthur Highway sa Davao City.

Sila ang mga Lumad na mula pa sa Marilog at Paquibato District sa Davao City.

Mula sa ilalim ng tulay ay lumipat ang mga Lumad sa tabi ng kalsada.

Gawa sa trapal at karton ang kanilang tinitirhang barong-barong. Dito na sila nagluluto, kumakain at natutulog.

Hindi alintana ng mga Lumad ang init at alikabok sa daan.

Ayon kay Edna Mansomina, hindi na siya bumalik sa Paquibato District dahil malayo sa ospital para sa buwanang pagpapagamot ng kanyang sakiting anak.

Nagtitinda lang ng basket si Edna sa tabi ng kalsada bilang kanyang hanapbuhay.

"Unta bisan gamay lang nga luna,hatagan lang mi, maglisod na kog uli kay tungod sa sakit sa akong anak, ginapatambalan na nako," ani Mansomina.

(Sana mabigyan kami ng kaunting lote, hirap ako umuwi dahil sa sakit ng anak ko, pinapagamot ko siya.)

Ayon kay Norma Gumapo ng CSSDO, ihahatid nila sa kanilang bahay ang mga Lumad at papadalhan ng tulong.

"Ibalik gyud sila sa origin kay diri man gud aside nga risky,lisod pod kay kwarta palita tanan," ani Gumapo.

(Ibabalik talaga sila sa kanilang lugar dahil maliban sa risky mahirap ang buhay dito dahil bilbilhin lahat.)

Ang mga hindi uuwi ay ipapalipat ng gobyerno sa ligtas na lugar.