Watch more in iWantv or TFC.tv

MAYNILA—Arestado ang isang ginang matapos niyang sampalin at murahin ang isang pulis sa Las Piñas City nitong Lunes.

Kinilala ang ginang na si Cheryl Hawkins Bautista, isang US citizen na nakatira ngayon sa Bacoor City, Cavite.

Ayon kay Police Col. Simnar Gran, hepe ng Las Piñas City police, nakatanggap sila ng tawag Lunes ng hapon ukol sa isang kustomer sa isang kainan.

"May customer na may unruly behavior. Nagsisigaw, nagmumura," aniya.

Hindi raw kasi tinanggap ang credit card ng ginang na pambayad sa bill ng kanilang kinain.

Kukuwestiyunin lang sana ng pulis ang ginang ukol sa insidente pero inakala nito na aarestuhin siya.

Sa kuha ng video, pinakakalma ng pulis ang ginang pero tuloy pa rin ito sa pagsisigaw. Nakiusap rin ang kasamang babae ni Bautista.

Nang muling murahin at dinuro ang pulis, aarestuhin na sana niya ang ginang pero sinampal siya nito. Kahit pinosasan na, pinagtatawanan ni Bautista ang mga pulis.

Dagdag ni Gran, nakainom umano ang ginang nang mangyari ang insidente.

"Allegedly 'yung customer ay medyo tipsy. Medyo nakainom lang ng konti. So medyo naging unruly na 'yung behavior niya," aniya.

Sinubukang kunan ng pahayag si Bautista pero tumanggi ito. Sinampahan siya ng kasong direct assault, disobedience to a person in authority, oral defamation at alarm and scandal.—Ulat ni Lady Vicencio, ABS-CBN News