MAYNILA — Nakauwi na sa Oriental Mindoro pasado alas-10 ng gabi noong Lunes ang isang bagong-panganak na nanay, kaniyang sanggol at pamilya matapos ang ilang araw nilang pagkakatengga sa Batangas port.

• Nanay na may bagong silang na sanggol tengga pa rin sa Batangas port

Apat na araw natengga sa isang jeep sa may Batangas port sina Madelyn Torres, sanggol niya, partner na si Pedro Palustre, at mga anak nila dahil galing sila sa modified enhanced community quarantine (MECQ) area, na hindi pinapayagan ng Oriental Mindoro.

Pero kapwa nagdesisyon ang pamunuan ng Batangas port at si Oriental Mindoro Governor Bonz Dolor ng exemption sa pamilya, dahil na rin sa kanilang kalagayan.

Nasa apat ang batang kasama ng mag-asawa, dagdag pa ang bagong-silang pa lamang na sanggol na si Remuel.

Nasa isolation facility sila ng Oriental Mindoro at ililipat ngayong araw sa quarantine facility sa bayan ng Gloria.

Doon sila sasailalim sa 14-day quarantine bago makauwi sa kanilang bahay.

—Ulat ni Andrew Bernardo, ABS-CBN News