3 bata, ina at lola minasaker sa bahay

MANILA - (UPDATED) Pinagsasaksak hanggang mapatay ng hindi pa nakilalang salarin ang 3 bata at kanilang ina at lola sa loob ng kanilang tahanan sa San Jose del Monte, Bulacan Martes.

Nadiskubre ang mga bangkay ng padre de pamilya na si Dexter Carlos Sr., isang security guard.

Nahanap ni Carlos sa loob ng kuwarto sa itaas na palapag ng bahay ang mga anak niyang edad 1, 7 at 11.

Sa likurang bahagi naman ng bahay nakita ang misis niyang si Estrella Dizon, 35, habang sa sala nadiskubre ang ina nitong si Auring Dizon.

Taliwas sa mga naunang ulat, napag-alaman ng mga imbestigador na sapilitang binuksan ang likurang pinto ng bahay, ayon kay Supt. Fitz Macariola, hepe ng San Jose del Monte police.

Ani Macariola, tinitingnan ang anggulong ginahasa ang mag-inang Estralla at Auring dahil wala silang saplot nang matagpuan.

Inaalam rin kung pinagnakawan ang mga biktima bagamat hindi nagulo ang mga gamit sa bahay nang mangyari ang krimen.

Naniniwala naman ang padre de pamilya na maaaring kakilala ng kanilang pamilya ang nasa likod ng krimen. Umapela siya sa salarin na sumuko na.

PANOORIN: Suspek sa massacre sa San Jose del Monte, Bulacan, maaaring kakilala umano ng mga biktima pic.twitter.com/uGIKLWAqKv |@jeffreyhernaez

— DZMM TeleRadyo (@DZMMTeleRadyo) June 27, 2017

Hindi pa tiyak ang mga imbestigador kung iisa lang ang pumaslang sa mga biktima.

Editor's Note: Ang ama ng mag-anak na naging biktima ng krimen ay si Dexter Carlos Sr.
Ang pangalan na unang lumabas sa ulat na ito ay Dexter Carlos Jr., na pangalan ng nasawing anak ni G. Carlos.
Humihingi tayo ng paumanhin para sa pagkakamaling ito.