Watch more in iWantv or TFC.tv

Arestado ang 32 katao mula sa apat na barangay sa magkakasunod na drug operation ng Quezon City Police District (QCPD) Lunes ng gabi.

Sa Molave, Payatas, nahuli ang walong suspek matapos makuhanan sa surveillance video ng QCPD Station 6 ang aktuwal na abutan at pagbebenta ng shabu ng mga target ng drug operation.

Narekober ng mga pulis ang 18 sachet ng shabu at baril.

Sa Isidora Street sa Barangay Holy Spirit naman, inaresto din ng mga pulis ang apat na suspek matapos maaktuhan ang kanilang drug session.

Anim na indibidwal pa ang nahuli sa magkahiwalay na drug operation sa Barangay Holy Spirit at Payatas.

Sa Barangay Kaligayahan sa Quirino Highway, hinuli ng QCPD Station 5 ang 11 na mga drug suspect matapos maaresto sa police checkpoint ang isa sa kanila na nagturo ng kanilang drug den.

Arestado ang pangunahing suspek na nasa drugs watch list ng pulisya.

Samantala, inaresto rin ng QCPD Station 10 ang tatlong suspek sa Barangay Immaculate Concepcion.

Modus umano ng mga suspek na kunwari ay magtinda ng cellphone accessories pero nagbebenta rin pala ng shabu sa mga drayber at konduktor ng bus.

Nakuha sa mga suspek ang may P100,000 halaga ng shabu.

Itinanggi naman ng mga nahuli ang kaso laban sa kanila.

--Ulat ni Doland Castro, ABS-CBN News